Манай гурван тулаанч эхний ялалтаа байгуулав

1398

Йорданы Амман хотод сонирхогчдын боксын олимпын эрх олгох тэмцээн эхэлсэн билээ. Тэмцээний хоёр дахь өдөр буюу өчигдөр манай гурван тулаанч рингэнд гарсан юм.

Эрэгтэйчүүдийн 52 кг-д Х.Энхмандах эхний тулаанаа Тажикстаны Сабзалиев Шухратын эсрэг хийж, хүнд цохилтоор ялалт байгуулав. Ингэснээр манай тамирчин Энэтхэгийн боксчин, ДАШТ-ий мөнгө, Азийн наадмын аварга Амит Пангхалтай учраа таарах боллоо. Өнгөрсөн жилийн ДАШТ-ээс мөнгөн медаль хүртсэн Амит Азийн наадамд түрүүлэхдээ Х.Энхмандахыг ялж байсан юм.

Эрэгтэйчүүдийн 69 кг-д Б.Мишээлт эхний тойрогт Катарын Царүмалингам Цүласиммараныг 5:0-ээр буулган авчээ. Манай тамирчин шөвгийн 16-д ДАШТ-ий хошой хүрэл, Ази тивийн АШТ-ий мөнгөтэй, Казахстаны Аблайхан Жусуповтой тулалдах аж.

Эмэгтэйчүүдийн 54 кг-д хүч сорьж буй Т.Болортуул эхний даваанд Папуа Шинэ Гвинейгийн Лога Флораг илт давуу илүүрхэв. Манай тулаанч шөвгийн наймд ДАШТ-ий хүрэл медальт, Австралийн Скай Николсонтой тулалдана.

Өнөөдөр буюу тэмцээний гурав дахь өдөр эрэгтэйчүүдийн 75 кг-д О.Бямба-Эрдэнэ Сирийн тулаанч Ахмад Гуосонтой, 63 кг-д Б.Чинзориг Папуа Шинэ Гвинейгийн Жон Уметай, 81 кг-д Н.Шинэбаяр Вьетнамын Ман Чуон Нгентай тус тус “нударга зөрүүлнэ”.