БРЕРА ИЛЧ 2:1 ХОВД
Хүснэгтийн байрлал ойрхон яваа багуудын тоглолт ач холбогдол хийгээд өрсөлдөөний хувьд хэзээд сонирхолтой байдаг. Үүнийг нотлох мэт “Брера Илч”, “Ховд” багууд маш өрсөлдөөнтэй тоглолтыг үзүүллээ.
Аргентин легионер Герман Леонел 34 дэх тооны харьцааг нээж “Брера Илч” тэргүүлээд эхлэв. Гэсэн ч түүний гоолоос ердөө дөрвөн минутын дараа “Ховд” клубийн Япон тоглогч Ёшиока Рен тэнцээний гоолыг оруулсанаар эхний хагас 1:1-ээр өндөрлөлөө.
“Брера Илч” энэ тоглолтод оноо алдвал “Ховд”-оос оноо тасрах аюултай байсан тул хожил ус агаар мэт хэрэгтэй байлаа. Тэрхүү чухал хэрэгтэй хожилд хөтөлсөн гоолыг авьяаслаг Япон тоглогч Сайто Ато 87 дахь минутад орууллаа.
Тоглолтын төгсгөлд тоог 2:1 болгож сэтгэл хөдөлгөм, өөрсдийнхөө урам зоригийг сэргээсэн хожил авсан “Брера Илч” энэ долоо хоногийн өрсөлдөгч “Ховд”-той адил долоон оноотой болж зэрэгцлээ.
СП ФАЛКОНС 2:1 ДЭРЭН
Энэ долоо хоногийн онцлох тоглолт өнгөрсөн улиралын аварга “СП Фалконс”, хүснэгтийг тэргүүлж явсан “Дэрэн” клубүүдийн хооронд боллоо.
Одоохондоо хүснэгтийн байрлал төдий яригдах ч цаашдаа аваргын хувь заяанд ч нөлөөлөхүйц өндөр ач холбогдолтой тоглолтын эхний гоолыг Солонгос хамгаалагч Ким Хвихан 12 дахь минутад оруулав. Түүний гоолоор “Дэрэн”-ий эхний хагасыг давамгайлж суугасан.
Гэсэн хэдий ч “СП Фалконс”-ын залуус лигийн аварга багийн зангаргыг харуулан, шийдвэрлэх үед хоёр гоол оруулж, маш үнэ цэнтэй гурван оноог авлаа. Тэдний эхний гоолыг Серби хагас хамгаалагч Неманья Крушевац 58 дахв минутад оруулж тоог тэнцүүлсэн юм.
Харин хожлын гоолыг “СП Фалконс”-ын хамгаалалтын ноён нуруу Тиаго Томайс 86 дахь минутад шитгэсэн юм. Тийнхүү гурван оноо авсан “СП Фалконс” 18 оноотой болж хүснэгтийн хоёр дугаарт бичигдэж эхэллээ.
УЛААНБААТАР 1:2 ХОРОМХОН
“Бишрэлт Хоромхон” баг туршлагатай тоглогчид болох Н.Наранболд, Д.Төрбат нарынхаа эзгүйд хүчтэй өрсөлдөгч “Улаанбаатар”-тай тааран тоглолоо.
Хоёр багийн тоглолтын эхний хагас гоолгүй тэнцээгээр өндөрлөхөд ойрхон байсан ч “Улаанбаатар” клубийн хамгаалагчид шүүгчийн мэдлийн цагт торгуулийн талбайдаа алдаа гаргав. 11 метрийн торгуулийн цохилтыг “Хоромхон” клубийн Япон тоглогч Судо Казуха амжилттай гүйцэтгэж багтаа тэргүүллийг авчирлаа.
Үүнээс хойш үр дүнгээ хамгаалахын төлөө тун нягт ажиллаж байсан “Хоромхон”-ы хамгаалалтыг О.Мижиддорж 87 дахь минутад эвдэж чадлаа. “Улаанбаатар” олон аюултай довтолгоо зохион байгуулсаны эцэст тоог тэнцүүлсэн ч харамсалтай нь нүд ирмэхийн зуурт дахин хожигдоод эхлэв.
О.Мижиддоржийн гоолоос ердөө ганцхан минутын дараа талбайн төвд алдсан бөмбөг нь сөрөг довтолгоо болж, “Хоромхон”-ы Узбекистан тоглогч Сатторов Мириншох хожлыг гоол орууллаа.
ХАНГАРЬД 0:4 ЭРЧИМ
Түүхт хоёр багийн тулаанд хэн ялсан нь хүснэгтийн байрлалаа ахиулах боломжтой байлаа.
Шинэ улиралын нээлт болсон легионер тоглогч бол яах аргагүй “Эрчим”-ийн Коү Готоү. Үүнийгээ ч батлах мэт “Хангарьд”-ын хаалганд эхний үед хоёр гоол оруулсан. Ингэснээр Коү Готоү найман тоглолтод 15 гоол өөрийн нэр дээр бүртгүүлж, мэргэн буучдын жагсаалтыг тэргүүлж байна.
“Эрчим”-ийн өөр нэг Япон тоглогч Тоши Макимото 48 дахь минутад тооны харьцааг 0:3 болгож, “Хангарьд” тун хүнд байдалд орсон. А.Эрдэнэбаяр дасгалжуулагчтай “Хангарьд” “Эрчим”-ийн хамгаалалтыг сэтэлж чадалгүй байсаар 0:4-өөр хожигдлоо.
Тоглолтын эцсийн цэг болсон гоолыг Г.Батбилгүүн 61 дэх минутад оруулсан юм. Мөнхийн өрсөлдөгчөөсөө үнэтэй гурван оноог салгасан “Эрчим” дээд лигийн хүснэгтийг тэргүүнд заларлаа.
ХАНТЕРС 9:0 ТӨВ АЗАРГАНУУД
Найм дахь долоо хоногийн хөшигийг хааж “Хантерс”, “Төв Азарганууд” багууд тоглоход “Хантерс” 9:0-ээр хожлоо.
“Хантерс” клубээс Чой Таемин гурав, Э.Мөнгөнбагана, Ан Саежун нар тус бүр хоёр, Нео Тамура, Н.Зоригт нар нэг нэг гоолыг өөрсдийн нэр дээр бүртгүүллээ.
Тийнхүү лигийн хоёр дахь хожлоо авсан “Хантерс” хүснэгтийн долоодугаар байрт бичигдэж байна. Тэд дараагийн тойрогт “Хоромхон”-той тоглож нэгдүгээр тойргийг өндөрлүүлэх бол “Төв Азарганууд” “Брера Илч”-тэй тоглоно.