NBA-гийн тоглогч асан Лорензен Урайтыг буудаж хөнөөсөн хэрэгт хуучин эхнэрийг нь буруутгаж, 30 жилийн ял оноолоо.

АНУ-ын Мэмфис хотод гарсан хамгийн цуутай аллагын хэргийн шүүх хурал дууслаа. NBA-гийн тоглогч байсан Лорензен Урайтыг буудаж хороосон хэрэг 9 жилийн дараа шийдэгдсэн юм.

2010 оны долдугаар сард Лорензен Урайтыг алга болсон хүний жагсаалтад оруулж, цагдаа нар эрлийн баг гаргасан. Үүнээс хойш 10 хоногийн дараа түүний цогцосыг машиндаа буудуулж, нас барсан байхад нь хууль сахиулагчид олсон билээ. Талийгаач нас барахаасаа өмнө 911 буюу цагдаагийн шуурхай дуудлагын утсанд холбогдсон ч буун дуу гарч, үүнээс хойш холбоо тогтоож чадаагүй юм.

Хэрэг явдлаас хойш хоёр жилийн дараа аллага болсон газрын ойролцоох нуурын эрэг дээрээс гар буу олдсон юм. Цагдаагийнхан уг гар бууг сэжигтэн Билли Рэй Тюрнерийнх болохыг тогтоосон. Түүнчлэн түүний гэрт хийсэн нэгжлэгийн үеэр гар буу эзэмших зөвшөөрөл, бусад галт зэвсэгийн хамт илрүүлсэн юм.

Өмнө нь нэг бус удаа гэмт хэрэгт холбогдож байсан Билли талийгаачийн зүлгийг тэгшилдэг ажил хийдэг байсан аж. Түүнийг буруутай эсэхийг тогтоох эцсийн шүүх хурал ирэх есдүгээр сард болно.

Харин түүний хамсаатан, энэ хэргийн гол захиалагч болох Шерраг хүний амь насанд санаатай халдсан гэж үзэж, 30 жил хорих ял оноолоо. Тэрбээр энэ ялынхаа 30% буюу 9 жилийг биеэр эдлээд хугацаанаасаа өмнө суллагдах эсэх шүүх хуралд дахин орох боломжтой болно. Шерра эцсийн шатны шүүх хурал болох хүртэл 20 сар шоронд хоригдсон юм.

Лорензен Урайт хуучин эхнэртээ нэг бус удаа гар хүрдэг байсан тул түүнийг хөнөөх төлөвлөгөөг боловсруулсан гэдгээ Шерра хүлээсэн юм. Сонирхуулахад, Шеррагийн үеэл Жимми Мартин гол гэрчээр оролцсон юм. Ж.Мартин 2012 онд найз бүсгүйгээ хөнөөсөн хэрэгт буруутгагдаж, 20 жилийн ял сонсоод одоо шоронд ялаа эдэлж байгаа аж. Түүний хэлснээр бол тэр гурав хамтдаа нэг бус удаа уулзаж, хохирогчийг Атланта дахь гэрт нь хөнөөхөөр төлөвлөж байсан гэнэ. Шерра дотор талаас нь цонх онгойлгож, Жимми, Билли хоёр гэрт нь орж, Лорензенийг хөнөөх төлөвлөгөөтэй байсан боловч гаднаас өөр хүн орж ирсэн тул зорилгоо биелүүлж чадаагүй гэнэ. Ж.Мартины мэдүүлгийн ачаар цагдаа нар хохирогчийг хөнөөсөн гар бууг нуурын эрэг дээрээс олсон билээ.