Мэргэжлийн боксын WBO холбооны өдөн жинд аваргын бүс эзэмшигч Гари Рассэль, Нямбаярын Төгсцогт нарын тулаан өнөөдөр боллоо.
12 үе үргэлжилсэн тулааны эцэст Гари Рассэль 116:112, 117:111, 118:110-аар буюу шүүгчдийн саналаар ялав.
Аваргын бүсээ тав дахь удаагаа хамгаалах зорилготой Пенсилваниагийн Аллентаун хотод ирсэн Гари өнөөдөр хурд, хүч, ухаан, туршлага гээд бүх юмаар илт давуу байлаа.
![](https://koo-bucket-2022.s3.ap-southeast-1.amazonaws.com/wp-content/uploads/2022/10/25013910/1581228276882.png)
“CompuBox’s” сайтын гаргасан албан бус тооцооллоор Г.Рассэль 867 цохилтоос 134 нь оновчтой болсон бол Н.Төгсцогтын 707 цохилтоос 122 нь өрсөлдөгчөө сандаргасан гэнэ.
“Өрсөлдөгч маань олимпын мөнгөн медальтай ч мэргэжлийн бокст 11 тулаан хийсэн тамирчин. Харин би 30-аас олон тулаан хийлээ. Энэ бол маш том зөрүү” гэж Гари ярьсан.
Харин Н.Төгсцогт хүлээж тоглосон нь алдаа боллоо гэж дүгнэсэн байна.
![](https://koo-bucket-2022.s3.ap-southeast-1.amazonaws.com/wp-content/uploads/2020/02/25013836/gary-russell-2_4.jpg)
Гари Рассэль энэ онд томоохон тулаан хийх төлөвлөгөөтэй гэдгээ мэдэгдсэн. Тэрбээр WBA холбооны аваргын бүс эзэмшиж буй Лео Санта Крузтай тулалдах хүсэлтэй байгаа билээ.
Г.Рассэль 2015-19 оны хооронд жилд ганц удаа тулаан хийсэн. Харин энэ жилийн хувьд тулааныхаа тоог нэмэх төлөвлөгөөтэй байгаа аж.