ХАНТЕРС 1:1 СП ФАЛКОНС 

Дээд лигт дэвшсэн цагаасаа хүснэгтийг тэргүүлэгч, том багуудын эсрэг хүчтэй өрсөлдөөн үзүүлж буй “Хантерс” клуб өнгөрсөн жилийн аварга “СП Фалконс”-той 1:1-ээр тэнцлээ. 

Илүү бөмбөг эзэмшиж, олон аюултай довтолгоо зохион байгуулж тоглосон “СП Фалконс”-оос эхний хагаст Бразил легионер Сантос гоол оруулав. Түүнд гоолын дамжуулалтыг баруун жигүүрийн хамгаалагч С.Дөлгөөн өгсөн.

Санаачлагыг гартаа авч тоглож байсан “СП Фалконс”-ын хамгаалалтыг “Хантерс” клубийн залуу тоглогч Ж.Мөнхболор эвдэж, 70 дахь минутад тоог 1:1 болгосон юм. Эсрэг багийн дөрвөн хамгаалагчийн дундаас тун овжин байдалаар оруулсан Ж.Мөнхболорын гоол нэг онооны үнэтэй байлаа. 

“Хантерс” улиралын 12 дахь оноогоо авч долоодугаар байрт бичигдэж байгаа бол “СП Фалконс” хүснэгтийг тэргүүлэх боломжоо алдав. 

БРЕРА ИЛЧ 0:3 ДЭРЭН 

Лигийн аваргын төлөөх аялалаа үргэлжлүүлсээр байгаа “Дэрэн” энэ долоо хоногийн өрсөлдөгч “Брера Илч”-ийг 0:3-аар буулган авлаа. 

“Дэрэн” клубийн гүйцэтгэсэн булангийн цохилтын үеэр “Брера Илч”-ийн тоглогч Б.Энхтулга санамсаргүй байдалаар өөрийн хаалганд гоол оруулж, тооны харьцаа 12 дахь минутад нээгдсэн. 

Удаах гоолыг Япон довтлогч Фунами Юутаро 42 дэх минутад оруулж “Дэрэн” эхний хагаст 0:2-ээр тэргүүлээд эхлэв. Тийнхүү Фунами Юутаро 18 гоолтой болж, мэргэн буучдын жагсаалтыг ганцаар өнгөлж байна. 

Хамгаалалт, довтолгоондоо алдаа гаргалгүй нягт нямбай тоглолт үзүүлсэн “Дэрэн”-ээс М.Мөнххүслэн 90 дэх минутад гоол оруулж, тоглолтын эцсийн цэгийг тавьсан юм. 

“Дэрэн” дараагийн тойрогт хүчтэй өрсөлдөгч “Эрчим”-тэй тоглох хуваарьтай байна. Тус хоёр баг улиралын эхэнд таарч тоглохдоо 2:2-оор тэнцэж байсан билээ. 

УЛААНБААТАР 0:0 ХАНГАРЬД 

Хүснэгтийн дөрөвт яваа “Хангарьд”, тавдугаар байрт бичигдэж байгаа “Улаанбаатар” клубүүд учраа тааран тоглож гоолгүй тэнцлээ. 

Хэдий гоол ороогүй ч гоол хийх боломжтой том том боломжуудыг хоёр баг ашиглаж чадаагүй. 

Тухайлбал “Хангарьд” клубийн Япон легионер Кайто Асоно 31 дэх минутад 11 метрийн торгуулийн цохилт алдлаа. Түүний цохилтыг зөвхөн клубтээ төдийгүй шигшээ багийн түвшинд торгуулийн цохилт маш сайн хаадаг хаалгач Э.Мөнх-Эрдэнэ аюлгүй болгосон юм.

Дашрамд дурдахад Кайто Асано нь Японы шигшээ багийн тоглогч Такума Асаногийн төрсөн дүү билээ. 

Харин “Улаанбаатар” клубээс А.Дөлгөөн цээжин дээрээ тогтоогоод хаалганд хүчтэй цохисныг “Хангарьд”-ын хаалгач Б.Ариунболд мөн л хаасан.

Тийнхүү хоёр багийн хаалгач нар чухал үед гайхалтай хаалтуудыг хийн, хаалгаа хуурай манаж, медальт байр, цаашлаад аваргын төлөө ч өрсөлдөх боломжтой багууд оноо хуваалаа. 

ХОВДЫН ХҮЛЭГҮҮД 4:2 ТӨВ АЗАРГАНУУД 

Энэ долоо хоногийн хамгийн олон гоолтой тоглолт “Ховдын Хүлэгүүд” болон“Төв Азарганууд” багуудын хооронд боллоо. 

“Төв Азарганууд” багт шинээр нэгдсэн туршлагатай тоглогч Ц.Мөнх-Эрдэнэ 6 дахь минутад булангийн цохилтоос шууд цохин гоол орууллаа. Энэхүү гоол нь “Төв Азарганууд” клуб 2024-25 оны улирал тоглолтын эхний гоолыг оруулсан анхны тохиолдол болсон юм. 

Гэсэн ч “Төв Азарганууд”-ын тэргүүлэл удаан үргэлжилсэнгүй. “Ховдын Хүлэгүүд” багийн Япон тоглогч Юута 27, 32 дахь минутад гоол оруулж, баг нь 2:1-ээр тэргүүлээд эхэлсэн. 

Лигийн анхны оноогоо эрэлхийж буй “Төв Азарганууд” Лукас Карвальёогийн гоолын ачаар 72 дахь минутад тоог 2:2 болгон тэнцүүлсэн ч үлдсэн хугацаанд үр дүнгээ хамгаалж чадсангүй. 

“Ховдын Хүлэгүүд”-ээс Кристофер Жерардо 75’, О.Есү-Очир 90+9’ нар гоол оруулж, баг нь лигийн гурав дахь хожлоо авлаа.

ЭРЧИМ 0:0 БИШРЭЛТ ХОРОМХОН 

Хожиж байж лигийн тэргүүн байрандаа дахин залрах байсан “Эрчим”, “Бишрэлт Хоромхон”-той хуурай тэнцлээ.  

Хоёр багийн улиралын эхний тоглолтод “Эрчим” 4:0-ээр илүүрхэж байсан ч “Бишрэлт Хоромхон”-ы залуус энэ удаад тийм зүйл болохыг зөвшөөрсөнгүй. 

Дээр дурдсанчлан “Эрчим”-ийн дараагийн учираа нь гол өрсөлдөгч “Дэрэн” клуб бол “Бишрэлт Хоромхон” 3-р сарын 28-ны баасан гарагт “Ховдын Хүлэгүүд”-тэй тоглоно. 

Лигийн эхний гурван байрын багийг ердөө гурван оноо зааглаж байгаа учраас аваргын төлөөх өрсөлдөөн цаашид улам сонирхолтой өрнөх нь тодорхой байна.