Үндэсний “Дээд лиг”-ийн 2024/25 оны улирлын хагас шигшээ буюу плэйоффын 2-р шатанд 2 дахь жилээ дараалан учраа таарсан “Эс Жи Эйпс”, “Бишрэлт Металл” багуудын цувралын 2 дахь тоглолт боллоо. Эхний тоглолтод 4 үеийн турш тун тэнцүүхэн өрсөлдөөн гарж, “Эйпс” 86:85 харьцаатай хожоод байсан. Тухайн тоглолтод “Эйпс” багаас Крис Клайбөрн багийнхаа сүүлийн 7 оноог дараалан авч, багаа ялалтад хүргэж байсан. 

Цувралын эхний тоглолтод хожигдсон “Металл” баг 2 дахь тоглолтыг тун эрч хүчтэй эхлүүлсэн. Хамгаалалт, довтолгоо нь жигд байж, эхний хагас 37:47 харьцаатай хошуучлав. “Металл” 3-р үед ч тоглолтын агуулгаа хадгалж байсан ч багийн хэмнэлийг удирдан авч явах гол тоглогч Т.Ууганбаяр алдааны асуудалд орсон юм. Улмаар “Эйпс” шийдвэрлэх 4-р үеийг 9 онооны дутуу эхлүүлсэн ч эсрэг багийн гарааны холбогч байхгүйг ашиглан өөрсдийн тоглолтоо сэргээж чадсан. Тэд  4-р үед 26 оноо авахдаа эсрэг багтаа 11 оноо алдаж, үндсэн цагт 79:73 харьцаатай хожлоо. Ийнхүү “Эйпс” тун чухал хожил авч, цувралыг 2:0 харьцаатай тэргүүлж эхлээд байна. 

М.ӨЛЗИЙ-ОРШИХ +20 ОНОО..

Цувралын эхний тоглолтод ердөө 6 оноо авсан М.Өлзий-Орших 2 дахь тоглолтод гялалзаж, 26 оноогоор багаа тэргүүллээ. Өмнөх тоглолтод 3 онооны шугамны араас 0/5 шидсэн бол, энэ удаад 5/9 шидэж 15 оноо авлаа. Үүний гурвыг нь тоглолтын 4-р үед оруулж, чухал үед лигийн үнэ цэнтэй тоглогчийн сэтгэл зүй ямар байгааг харууллаа. Түүний хувьд эхний 3 үед нийт 10 оноо авсан ч 4-р үед 16 оноо авсан нь бүх тоглогчийг тэргүүлэх үзүүлэлт болов. Ялангуяа сүүлийн үеийн дунд хэсэгт оноо 60:65 байх үед дараалан хоёр удаа холын шидэлтээ оруулж, багаа оноогоор илүү гаргасан нь тус тоглолтын эргэлтийн цэг болсон юм. Харин “Металл” баг энэ тоглолтод 32 минут онооны тэргүүлэлтэй явсан ч төгсгөл хийж чадсангүй. Тэд 3 онооны шугамны араас багаараа 33.3%-ийн (7/21) оновчтой шидэж, 21 оноо авчээ. 

ХУРДАН ДОВТОЛГОО… 

Тоглолтын эхний хагаст “Эйпс” өмнөх тоглолтын адил илүү хурдтай тоглолтыг үзүүлэхийг хичээж, довтолгооноос хамгаалалт, хамгаалалтаас довтолгоонд хурдтай шилжиж тоглохыг хичээж байлаа. Гэсэн ч хурдан довтолгоонд орох үедээ бөмбөгөө цөөнгүй алдаж байв. Баг хурдан довтолгоонд орохдоо бөмбөгөө алдсан нөхцөлд ард нь сул зай их гарсан байдаг тул зөрөөд эсрэг багтаа маш хялбар байдлаар оноо алдах магадлал өндөр болдог. Үүнийг ч “Металл” сайн ашигласан нь эхний хагасын гол зөрүү байсан. Тодруулбал эхний хагаст бөмбөг тасалсан тоогоор “Металл” 5:9 харьцаагаар илүүрхсэн нь өнөөх 10 онооны зөрүү гарсан гол шалтгаан байв. 

Гэхдээ 2-р хагаст “Эйпс” энэ алдаагаа залруулж, багуудын бөмбөг алдсан тоо адил 20:20 харьцаатай тоглолт өндөрлөв. Түүнчлэн “Эйпс” эсрэг багийн алдсан бөмбөгнөөс авсан оноогоор 21:18, хурдан довтолгоогоор авсан оноогоор 20:17 харьцаатай илүүрхсэн юм. Багуудын хоёр легионер төвийн тоглогчийн өрсөлдөөн болон будагтай талбай дахь өрсөлдөөн тун тэнцүү байна. Тийм учраас энэ цувралд урд шугамны хурдтай тоглогчдоос их зүйл шалтгаалах нь тодорхой. Тухайлбал Крис өмнөх тоглолтод багаасаа хамгийн урт буюу 30 минутыг талбайд өнгөрүүлж, мөн хамгийн олон оноо авч тоглолтыг ч шийдэж чадсан. Тэгвэл энэ удаад М.Өлзий-Орших мөн хамгийн урт буюу 34 минут тоглож, багаа ч ялалтад хүргэлээ. 

Дасгалжуулагчийн хувьд ч урд шугамнаасаа хэн тоглолттой байна түүнийг талбайд удаан байлгаж, довтолгоог удирдуулж байна. Тийм ч учраас эхний тоглолтод “Металл” 2 холбогчтой хамгаалж, тоглолтын төгсгөл хүртэл оноо ойрхон явсан юм. Харин энэ удаад Т.Ууганбаярын эхнээсээ алдааны асуудалд орсон нь багийнхаа хамгаалалтад сөргөөр нөлөөллөө.  

АЛДАА… 

Энэ тоглолтод багуудын ихэнх үзүүлэлтүүд ойролцоо байсан ч хамгийн хол зөрүү гарсан нь алдааны харьцаа 17:28 байлаа. Тэр ч утгаараа “Эйпс” торгуулийн шугамны араас 28 шидэж 18 оноо авсан бол “Металл” 8/12 үзүүлэлттэй тоглолтыг дуусгав. Энэ 10 онооны зөрүү хожил, хожигдлыг шийдсэн явдал боллоо гэхэд буруудахгүй байх. Өмнөх тоглолтод ч “Эйпс” торгуулийн шидэлтээр авсан оноогоор 18:8 харьцаагаар илүү байсан юм. Иймээс тус цувралд тоглогчдын жижиг алдаа, үйлдэл бүр шийдвэрлэх нөлөө үзүүлж, тоглолтын хэмнэлд яаж ч нөлөөлж болохыг харлаа. Шүүгчдийн шийдвэр яаж ч гарсан энэ чухал шатанд тамирчид хяналтаа алдахгүй байх нь хамгийн анхаарах шаардлагатай зүйл болоод байна. 

“Металл” багийн ахлагч Т.Ууганбаяр энэ тоглолтын 3-р үеийн дунд хэсэгт 4 дэх алдаагаа гаргаж, сэлгээний сандал руу шилжсэн. Дараа нь 4-р үеийн цаг дуусахад 5 минут дутуу байх үед алдаа нь 5 болж, тоглолтыг үрэглжлүүлэх боломжгүй боллоо. Мөн Б.Сүхбат түүнээс өмнө 5 алдаатай болж, талбайг чөлөөлсөн гээд “Металл”-аас гарааны 2 тоглогч нь ялагчийг шийдэх 4-р үеийн талд нь ч тоглож чадсангүй. 

Гарааны тоглогчдын алдааны тоо 6:19 харьцаатай байв. “Металл”-аас Т.Ууганбаяр, Б.Сүхбат нар 5 алдаа, А.Энхбаясгалан 4, З.Энхтөр 3, Скотт 2 алдаа гаргажээ. Нөгөө талын гараанаас Ден Акоут, М.Өлзий-Орших нар хамгийн олон буюу тус бүр 2 алдаа гаргасан нь өрсөлдөгч багийн гарааны хамгийн цөөн алдаатай тоглогчийн үзүүлэлттэй адил байв. 

Үүний өөр нэг шалтгаан нь “Эйпс”-ийн сэлгээнээс Крис 29 минут, Н.Ганбаатар 21 минут, Ц.Санчир 13 минут, Т.Мэндбаяр 10 минут гээд 4 тоглогч 10-аас дээш минутын хугацаанд талбайд тоглож, гарааны тоглогчдын хамгаалалтын ачааллыг бууруулсантай холбоотой. Харин “Металл”-ын сэлгээнээс Уэйсли, А.Батхуяг нар л 10+ минут тогложээ. Товчхондоо Эйпс”-ээс Н.Ганбаатар, Т.Мэндбаяр нарын сэлгээнээс үзүүлсэн нөлөө, зөрүү илт мэдэгдэхүйц байлаа. 

– – – 

Багууд өнгөрсөн жилийн лигийн хагас шигшээд өрсөлдөхөд “Металл” эсрэгээрээ эрт тэргүүлж эхэлж байлаа. Гэхдээ “Эйпс” дараалан 2 хожиж, 3:3 болгон тэнцүүлж байсан ч “Металл” цувралын 7 дахь тоглолтод ялж шигшээ шатанд шалгарч байсан юм. Сүүлийн 2 жил дараалан энэ шатыг давж, лигийн аваргын төлөө өрсөлдсөн “Металл” тус цувралд тийм ч амархан мултарчихгүй л болов уу. Тэд Азийн “Аваргуудын лиг”-ийн тэмцээний хүрээнд Малайзын багтай тоглоод ирсэн нь ачаалал нэмж, энэ цувралд сөргөөр нөлөөлж байна гэж олон хүн ярьж буй. Гэвч плэйоффын эхний шатанд “Эйпс” тэднээс 2 тоглолт илүү хийсэн гээд бас л ачаалалтай байсан. 

Энэ цувралын дараагийн буюу 3 дахь тоглолт их зүйл шийдэх учиртай. “Эйпс” хожвол энэ шатнаас цааш шалгарах магадлал 80-90% болж хувирна. Ийм тэнцүүхэн багуудын өрсөлдөөнд цуврал 3:0 болсон тохиолдолд нөгөө баг нь 4 дараалан хожно гэдэг бараг л боломжгүй. Харин эсрэгээрээ “Металл” 3 дахь тоглолтод хожвол цуврал тэс өөр болж хувирах юм. Лигийн шинэ аварга болох хүслээ биелүүлэхийн төлөө тус хоёр багийн нэг нь л финалын шатанд тоглох учиртай. Энэхүү сонирхолтой цувралын дараагийн тоглолт 4-р сарын 01-ний өдөр болно.