Монголын сагсан бөмбөгийн холбооны 30 дахь удаагийн “Дээд лиг”-ийн тэмцээний хагас шигшээ шат, “”Хасын Хүлэгүүд”, “Сэлэнгэ Бодонгууд” багуудын цувралын 6 дахь тоглолт боллоо. Цувралд “Бодонгууд” баг хожигдох эрхгүй болж, хожлын харьцаа 3:1 болоод байсан учраас хожихоос өөр сонголтгүй болоод байсан. Тус тоглолтод “Бодонгууд” эхний үед 9 оноо (19:28), эхний хагаст 15 онооны (38:53) тэргүүлэл авлаа. Улмаар 2-р хагаст онооны зөрүүгээ хадгалж 90:101 харьцаатай хожсоноор цуврал 3:2 харьцаатай болж ойртож байна.
ГАРАА САЙН БОЛ…
Заавал хожих шаардлагатай энэ тоглолтод эхнээсээ онооны тэргүүлэл авч чадсан нь “Бодонгууд”-ыг сэтгэл зүйн дарамтаас гаргаж, эерэг нөлөө боллоо. Тэд энэ тоглолтын эхний оноог авснаас хойш 40 минутын турш эсрэг багтаа огт онооны тэргүүлэл алдаагүй бөгөөд 39 минут 36 секундэд нь тэргүүлж, үлдсэн 24 секундийн хугацаанд багууд оноо тэнцүү явсан байна. Хэрвээ тоглолтын эхнээс тэд оноо тэнцүү эсвэл дутуу явсан бол хөөж тоглоход сэтгэл зүйн хувьд нэлээд дарамт болохоор байлаа. Тэд эхний хагаст оноо илүү явах үедээ ч техникийн болон спортын бус алдааг нийт 3 удаа авсан зэргээс нервтэй байсан нь харагдсан.
Өмнөх тоглолтуудад “Бодонгууд” эхний хагаст оноо илүү гарсан тохиолдлууд байсан ч хожиж чадаагүй тоглолтууд бий. Гэхдээ эхний хагаст 10-аас дээш онооны зөрүү гаргаж чадсан 2 тоглолтдоо л хожиж чадлаа. Тэдний хувьд эхнээсээ оноо салах нь чухал байгаа бол “Хүлэгүүд” оноо ойр байж чадвал 4-р үед төгсгөл илүү хийж чадаж байна.
“Бодонгууд” энэ тоглолтын эхнээс довтолгооны хувь маш өндөртэй байсан нь хожлын гол шалтгаан боллоо. Улмаар 2-р хагаст ч үүнийгээ хадгалж, тоглолтын турш 62%-ийн оновчтой (36/58) довтолжээ. Энэ нь энэ жилийн лигийн хагас шигшээ шатанд 100+ оноо авсан анхны тохиолдол болж байгаа юм. “Бодонгууд” хамгийн холдоо 20 онооны тэргүүлэл авч чадсан. Эхний хагаст л гэхэд 3 онооны шугамны араас 8/12 гэж шидсэн торгуулийн шидэлтийн үзүүлэлт мэт өндөр хувьтай байв. Мөн довтолгоо, хамгаалалтын самбартаа 4-р үед цөөн хэд алдаа гаргасныг эс тооцвол тун нягт тоглсон. Улмаар 21:29 харьцаатай самбарт илүү байсан нь хожилд хүргэсэн гол үзүүлэлтүүдийн нэг байлаа. Үүнд А.Базаргүр, Ц.Сэргэлэнбаатар нарын нөлөө их байсан төдийгүй хамгаалалт нь ч сайн байлаа.
АХМАД ГИЛБЕРТ…
Цувралын 5 дахь тоглолтын гол баатар бол Ахмад. Ямар ч маргаан байхгүй. Тоглолтын эхнээс довтолгооны хувь тун өндөр байж (14/23) нийт 40 оноо авсан үзүүлэлтээр бүх тоглогчийг тэргүүлэв. Ингэхдээ 12 удаа холын зайнаас шидсэний 8 нь оновчтой болж, торгуулийн шидэлтийг 4/4 буюу 100% оновчтой шидсэн байна. Мөн 9 удаа самбараас бөмбөг авсны 3 нь довтолгооны самбар байсан төдийгүй 31 минут талбайд тоглохдоо ердөө 2 удаа л бөмбөг алдсан нь онцлох үзүүлэлт. Тэрээр энэ цуврал эхэлснээс хойш хамгийн удаан тоглосон тоглолт нь энэ болсон байна. Мөн өмнөх тоглолтуудын дунджаар 2 тоглолтод авч байсан оноогоо энэ удаад нэг тоглолтод авч гангарлаа.
Түүний өмнөх 4 тоглолтын үзүүлэлтүүд:
- 24:11 секунд – 4/13 довтолгоо – 12 оноо
- 32:21 секунд – 12/21 довтолгоо – 33 оноо
- 26:45 секунд – 7/15 довтолгоо – 19 оноо
- 30:13 секунд – 8/19 довтолгоо – 23 оноо
СЭЛГЭЭ!!!
“Бодонгууд”-ын сэлгээний тоглогчид энэ удаад 43 оноо авсан нь цувралын өмнөх тоглолтуудаас ахисан үзүүлэлт болсон. Гэвч үүний 40 оноог нь Ахмад ганцаараа авч, үлдсэн 3 оноог нь Б.Батзолбоо авчээ. Харин “Хүлэгүүд”-ээс сэлгээний 5 тоглогч нь нийт 60 оноо авсан юм. Тодруулбал Б.Билгүүн 21, Б.Барсболд 18, Иан Миллер 17 оноо авсан гээд багаа оноогоор тэргүүлсэн 3 тоглогч нь сэлгээнээс тоглосон байв.
Хэдийгээр энэ тоглолтод “Бодонгууд” хожсон ч цуврал цааш үргэлжлэх тусам тэдний гол тоглогчдод ирж буй ачаалал нэмэгдсээр байна. Гарааны тав нэмээд Ахмад гэсэн үндсэн “ЗУРГААН БОДОН” л энэ цувралд гол үүрэг гүйцэтгэсэн хэвээр. Тэгвэл “Хүлэгүүд” эсрэгээрээ сэлгээ нь гарааны тоглогчдоосоо илүү олон минут тоглож, илүү олон оноо авах тохиолдол ч цөөнгүй байна. Энэ нь урт цувралд эерэг үр дүн авчирч буй нь 3 болон 4 дэх тоглолтоос харагдсан билээ.
Сэлгээний тоглогчдын авсан оноо:
- “Бодонгууд” 12 : 27 “Хүлэгүүд”
- “Бодонгууд” 37 : 44 “Хүлэгүүд”
- “Бодонгууд” 19 : 60 “Хүлэгүүд”
- “Бодонгууд” 23 : 31 “Хүлэгүүд”
- “Бодонгууд” 43 : 60 “Хүлэгүүд”
О.ТУЛГЫН ТОГЛОЛТ ХЭРЭГТЭЙ…
“Бодонгууд” хэдийгээр “BCH Knights” багийг эхний шатанд 4:1 харьцаатай хожсон ч багийн гол холбогч О.Тулга маш ачаалалтай тоглосон. Улмаар “Хүлэгүүд”-ийн эсрэг 3 дахь тоглолтоос эхлээд буюу түүний энэ жилийн плэйоффын 8 дахь тоглолтоос ачаалал нь илт мэдэгдэж эхэлсэн. Өмнөх шатанд олон талт тоглолтыг харуулахын зэрэгцээ 13.6 оноо дунджил байсан О.Тулга энэ цувралын эхний 5 тоглолтод дунджаар 9.0 оноо авч байна.
Мөн өмнөх шатанд сайн байснаар “Хүлэгүүд”-ийн судалгаанд хамгийн их орж, хамгийн анхааралдаа авах тоглогч нь болсон. Тэрээр энэ цувралд тоглолтоо гаргаж чадахгүй байгаа нь үүнтэй шууд холбоотой. Өмнөх шатны О.Тулгыг талбайд харахыг багийг дэмжигчид нь юу юунаас илүү хүсэж буй. Ийм тул дасгалжуулагчид болон багийн хамтрагчид нь үүн дээр нэн түрүүнд анхаарч туслах хэрэгтэй. Хэрвээ түүний тоглолтыг гаргаж чадвал багийн бусад бүх тоглогчийн тоглолтод эергээр нөлөөлөх тул багт нь маш ашигтайгаар тусна.
Гэвч “Хүлэгүүд”-ийн О.Тулга дээр хийж буй урагш шахсан хамгаалалт үр дүнгээ өгсөн хэвээр. Мөн хамгаалагчид нь солигдон орж ирж, түүнийг идэвхтэй хамгаалалтаар ядрааж байгааг энэ цувралын эхний 5 тоглолтын турш харлаа. Эсрэг багийнхаа гол холбогч, довтолгоо хувилбарыг найруулах тамирчны тоглолтыг гаргахгүй байна гэдэг тухайн багт хамгийн ашигтай зүйлсийн нэг юм. Гэхдээ 5 дахь тоглолтод Ахмад энэ талыг сайн нөхөж, бөмбөг залах, довтолгоо эхлүүлэх ажлуудыг сайн хийсэн. Бөмбөгөө ч цөөн алдаж, довтолгоонууд нь оноогоо авсаар байсны дүнд баг нь хожсон юм.
– – –
Ийм учраас “Бодонгууд” хэдийгээр хожсон ч асуудалтай зүйлс байсан хэвээр л байна. Тэд тоглолт бүрд ийм “гоолтой” байж, Ахмад тоглолт бүрд ийм байвал ямар ч багийг хожиход асуудал гарахгүй. Гэхдээ бусад талаар анхаарах зүйлс байсан хэвээр. “Хүлэгүүд” ч дараагийн тоглолтод энэ удаагийнх шиг байхгүй нь ойлгомжтой болов уу. Мөн энэ тоглолтын 4-р үед “Хүлэгүүд” ялангуяа Б.Билгүүн, Б.Барсболд нар дараалан 7 довтолгоо (6 холын шидэлт) амжилттай болгож нийт 20 оноо авсан. Энэ нь багтаа бид ямар ч онооны зөрүүг хөөх боломжтой гэсэн итгэлийг өгч чадсан нь дараагийн тоглолтуудад сэтгэл зүйн хувьд том итгэл өгсөн чухал зүйл боллоо. Бид цуврал 6 тоглолт үзэх үү эсвэл шийдвэрлэх 7 дахь тоглолт уу? Хариултыг пүрэв гарагт…