БИШРЭЛТ ХОРОМХОН 2:1 ХОВДЫН ХҮЛЭГҮҮД 

Дээд лигийн хоёрдугаар тойргийн гурав дахь долоо хоногийн нээлтийн тоглолтод “Бишрэлт Хоромхон” 2:1-ээр хожлоо. 

Н.Наранболд өөрийгөө ямар хэмжээний ур чадвартай, гоолын мэдрэмжтэй довтлогч вэ гэдгийг дахин нэг удаа харуулан, агаар дээр байсан бөмбөгийг зүүн хөлөө гуядаж цохиод гоол оруулав. Энэхүү гоёмсог гоол эхний хагасын цор ганц гоол байлаа. 

Хоёрдугаар үеийн 84 дэх минутад О.Оюунбаатарын чөлөөт цохилтоос дамжуулсан бөмбөгийг төвийн хамгаалагч Манеш Курош мөргөж гоол оруулан “Бишрэлт Хоромхон” 2:0-ээр тэргүүлээд эхэлсэн юм. 

“Ховдын Хүлэгүүд” багийн Япон тоглогч Ватанебе Юуга 89 дэх минутад торгуулийн цохилтоос гоол оруулж, тоог ойртууллаа. Юуга гурван тойрог дараалан гоол оруулж байгаа нь энэ юм. 

Үлдсэн хугацаанд “Бишрэлт Хоромхон” клуб үр дүнгээ хамгаалж, лигийн зургаа дахь хожлоо авч 19 оноотой, хүснэгтийн тавдугаар байрт бичигдэж байна. Харин “Ховдын Хүлэгүүд” 11 оноотой наймдугаар байрт явна. 

ХАНГАРЬД 5:1 ТӨВ АЗАРГАНУУД 

Лигийн эхний гурван багийг шил даран нэхэж яваа “Хангарьд” клуб энэ долоо хоногийн өрсөлдөгч “Төв Азарганууд”-ыг 5:1-ээр хожлоо. 

“Хангарьд” клубээс Кайти Асано хоёр гоол оруулж, Г.Гантогтох, Мишима Юта, Ино Тацүяа нар тус тус нэг гоолыг эсрэг багийнхаа хаалганд хийлээ. 

Харин “Төв Азарганууд”-ын гүйцэтгэсэн булангийн цохилтоос ирсэн бөмбөгийг “Хангарьд”-ын хаалгач Б.Ариунболд өөрийн хаалганд оруулж, “Төв Азарганууд” нэр гэж болох гоолыг бүртгүүлэв. 

“Хангарьд” 4-р сарын 5-ны бямба гарагт 19:15 цагаас “Хантерс” клубтэй тоглоно. Нэгдүгээр тойрогт “Хантерс” 4:1-ээр хожиж байсан тул “Хангарьд”-ын залуус хариугаа авахын тулд хянамгай тоглолт үзүүлэх биз ээ. 

Тэгвэл “Төв Азарганууд” лигийн хүчтэй багуудын нэг “Бишрэлт Хоромхон”-той ням гарагийн 19:15 цагаас тоглох хуваарьтай байна. 

СП ФАЛКОНС 2:0 БРЕРА ИЛЧ 

Аваргын цомоо хамгаалахын төлөөх ширүүн өрсөлдөөн өрнүүлж буй “СП Фалконс” “Брера Илч”-ийг 2:0-ээр хожиж, хүснэгтийг тэргүүлж эхэллээ. 

Сүүлийн жилүүдэд дээд лигт сайн тоглож аваргын цом өргөж, цаашлаад үндэсний шигшээ багт дуудагдаад амжсан “СП Фалконс”-ын хамгаалагч С.Отгонцагаан 11 дэх минутад чөлөөт цохилтоос ирсэн бөмбөгийг мөргөж гоол болгов. Түүний оруулсан гоолоор баг нь эхний хагаст тэргүүллээ. 

Лигийн хүчирхэг довтолгооны бүрэлдэхүүнтэй багуудын нэг “СП Фалконс” хоёрдугаар үед ч аюултай довтолгоонуудаа зохион байгуулсаар байлаа. Тиймдээ ч 61 дэх минутад Серби хагас хамгаалагч Неманья Крушевац мөн л мөргөж гоол оруулж, тоог 2:0 болгосон юм. 

Тийнхүү гурван оноогоо авсан “СП Фалконс” 4-р сарын 4-нд 19:15 цагаас “Эрчим” клубтэй тоглох чанга хуваарьтай байна. Нөгөө талд “Брера Илч”-ийг “Улаанбаатар” гэсэн хүнд учраа хүлээж буй.

УЛААНБААТАР 2:1 ХАНТЕРС

Тус хоёр баг лигийн нэгдүгээр тойрогт учраа тааран тоглоход 1:1-ээр тэнцэж байсан бол энэ удаад “Улаанбаатар” клуб 2:1-ээр хожлоо.

Бэртэл гэмтэлээс болоод өөрийн тоглолтоо төдийлөн сайн гаргаж чадахгүй байсан “Улаанбаатар” клубийн довтлогч О.Мижиддорж 47 дахь минутад булангаас ирсэн бөмбөгийг мөргөж гоол орууллаа. 

Удаах гоолыг “Хантерс” клубийн хаалгач Б.Мөнхболд тун санамсаргүй байдлаас өөрийн хаалганд оруулав. “Улаанбаатар”-ын хагас хамгаалагч Ц.Баасанжавын алсын цохилт хаалганы шон онож, ойж гарч ирсэн бөмбөг нь хаалгачийн биед цохиод гоол болсон юм. 

Хоёр гоолоор хожигдоод эхэлсэн “Хантерс” 78 дахь минутад Тамура Неогийн гоолоор тооны харьцааг ойртуулсан ч үлдсэн хугацаанд үр дүнг өөрчилж чадсангүй. 

ДЭРЭН 1:1 ЭРЧИМ 

Аваргын төлөөх өрсөлдөөний гол дүр болоод байгаа “Дэрэн”, “Эрчим” багууд дахиад л тэнцлээ. 

Дахин гэж хэлсэний шалтгаан нь хоёр баг лигийн нэгдүгээр тойрогт 2:2-оор эвийн гэрээ байгуулсан юм. 

“Дэрэн” клубийн нэгэн аюултай довтолгоог “Эрчим”-ийн хаалгач А.Сайханчулуун таслах оролдлого хийн, хүчтэй цохисон бөмбөг нь Фунами Юутарогийн хөлд ойж гоол орсоноор 4 дэх минутад “Дэрэн” тэргүүлээд эхлэв. 

Хоёрдугаар тойрог эхлээд тун сайн тоглолтыг үзүүлж буй “Эрчим”-ийн хагас хамгаалагч Г.Төгөлдөр 29 дэх минутад мөргөж гоол оруулсан нь нэг онооны үнэтэй байлаа.

Гэрэл зургийг: Хангарьд клубийн хуудаснаас