Үндэсний “Дээд лиг”-ийн тэмцээний хагас шигшээ шатанд 2 дахь жилээ дараалан өрсөлдөж буй “Бишрэлт Металл”, “Эс Жи Эйпс” багуудын 3 дахь тоглолт боллоо. Цувралд 2:0-р хожигдож байсан “Металл” энэ удаад хожихгүй бол тун хүнд байдалд орох байлаа. Эхний хагаст багууд тэнцүүхэн тоглосон бөгөөд Девон Скотт 2-р үеийн эхэнд 3 алдаа, З.Энхтөр 1-р үеийн дунд үед 2 алдаатай болсноос өөр онцлох зүйл байсангүй. 

“Металл” тоглолтын 2-р хагасыг нэг л онооны дутуу (41:42) эхлүүлсэн ч тоглолт эхний хагасаас тэс өөр болж өөрчлөгдөв. Тодруулбал 3-р үеийн эхний 3:30 секундэд “Эйпс” 15 оноо авахдаа ердөө 4 оноо алдаж, маш богино хугацаанд 10+ онооны зөрүү үүсгэж чадсан. Улмаар 3-р үеийг 17 онооны илүүтэй (54:71) дуусгаж, үндсэн цагт тэргүүллээ хадгалсаар 84:87 харьцаатай хожлоо. 

Гэхдээ “Металл”-аас хоёр тоглогч нь эрт алдааны асуудалд орж, мөн гарааны тоглогч А.Энхбаясгалан торгуулийн улмаас энэ тоглолтод оролцоогүй зэрэг нь бусад тоглогчдын ачааллыг илт нэмсэн нь ойлгомжтой. Үүний нөлөөгөөр гарааны хамгаалагчид нь 3-р үеэс бага зэрэг суларч байгаа байдал ажиглагдаж байлаа. Мөн багийн ахлагч Т.Ууганбаяр, Байрон Уэсли нарын урд шугамны гол тоглогчид нь энэ удаад тоглолттой байсангүй. Т.Ууганбаярын тоглолтод гэмтэл сөргөөр нөлөөлж байж болох. Харин Уэслиг тоглолтын эхнээс нөхөж эсвэл давхар хамгаалж, тоглолтыг нь хязгаарлаж чадсан нь “Эйпс”-ийн хэрэгжүүлж чадсан хамгийн чухал зүйлсийн нэг болсон. 

ДАСГАЛЖУУЛАГЧДЫН НҮҮДЭЛ…

“Эйпс”-ийн 3-р үеийн сайн тоглолтын дараа ахлах дасгалжуулагч Лале Горуновичийн хувцас солих өрөөний яриаг тун үр дүнтэй хийжээ гэж дүгнэхээр байв. Тэд эсрэг багийнхаа эхний хагасын тоглолтууд дээр маш сайн дүгнэлт хийж гарч ирсэн нь хамгаалалтаас нь харагдаж байлаа. “Металл” олон удаа довтолгооны хувилбаргүй болж мөн довтолгоогоо дуусгаж чадахгүй байх тохиолдлууд ч гарч байсан. Улмаар хамгаалалтаасаа сөрөг хурдан довтолгоонуудыг дараалан амжилттай болгож, багаараа тун жигд ажиллаж чадсан юм. 

Ийнхүү 3-р үед “Эйпс”-ийн дасгалжуулагчийн нүүдлүүд бүрэн илүүрхсэн бол 4-р үед “Металл”-ын дасгалжуулагч Цепелис Эванголес хариуг нь барив. Тэрээр багийн ахлагч Т.Ууганбаярыг 2-р хагаст суулгаж, А.Батхуягийг олон минут тоглуулсан нь тамирчдаа мэдэрсэн, тун зөв шийдвэр байлаа. Мөн 4-р үеийн эхнээс багаа бүтэн талбайд хамгаалах тактикаар тоглуулсан нь онооны зөрүүг ойртуулсан гол шалтгаан болов. Үүний дүнд эсрэг баг нь өмнөх үеүдээс харьцангуй олон удаа бөмбөгөө алдаж, мөн илүү яарсан довтолгоонуудыг гүйцэтгэж, шидэлтүүдээ ч цөөнгүй алдсан. Тоглолтын турш “Эйпс” 18 удаа бөмбөг алдсан нь эсрэг багаасаа 6-р олон байв.   

Сайн хамгаалалтынхаа дүнд “Металл” 4-р үед 16 оноо алдаж, 30 оноо авсан. Улмаар тоглолтын сүүлийн 2 минутад онооны зөрүүг 4 болгон ойртуулж чадлаа. Үүнийхээ дараа ч дараалсан сайн хамгаалалтуудыг хийж чадсан ч оноо авах хэд хэдэн боломжуудаа алдсанаар 3 онооны дутуу хожигдов. Гаргасан боломжуудаа оноо болгож чадахгүй байсан нь тэдний гол асуудал байлаа. Энэ нь 4-р үеийн турш хийсэн өндөр ачаалалтай хамгаалалтын сөрөг тал ч байж ч болох юм. Гэхдээ багийн спортод шийдвэрлэх чухал мөчид л багийн чанар танигддаг учиртай. 

“Металл”-ийн энэ удаагийн хожигдол довтолгооны оновчтой нь шууд холбоотой. Тэд 78 довтлоод 32-ыг нь оновчтой болгосон бол “Эйпс” 14-р цөөн буюу 64 довтолсон ч адил 32-ыг нь оруулжээ. “Эйпс” ийнхүү 50%-ийн оновчтой довтолсноос гадна торгуулийн шидэлтээс авсан 6 онооны зөрүү (16:10) чухал хэрэгтэй байлаа. 

ОНЦЛОХ ТОГЛОГЧИД…

Тоглолтын 4-р үед М.Өлзий-Орших торгуулийн шугамны араас нийт 6 оноо авлаа. Тэр энэ тоглолтын турш торгуулийн шидэлтээ 10/11 оновчтой гүйцэтгэсэн бөгөөд 4-р үед 9 оноо, нийт 23 оноо авлаа. Мөн 11 ашигтай дамжуулалт өгч, 4 удаа бөмбөг тасалжээ. 

Мөн Э.Мөнхбаярын хувьд тоглолтын эхнээс довтолгоо, хамгаалалтад жигд сайн байлаа. Гэвч 4-р үед эсрэг баг нь оноо хөөж яваа эгзэгтэй үед ойрхон 2 удаа бөмбөгөө алдав. Улмаар тухайн мөчид эсрэг баг нь онооны зөрүүг 7 болгож ойртуулсан юм. Э.Мөнхбаяр энэ өдөр ердөө 4 довтолгоо алдаж (7/11) 15 оноо авлаа. Ден Акоут довтолгооны самбараас 4 удаа бөмбөг авсан нь онцлох үзүүлэлт байж, мөн 13 оноо авсан байна. 

“Металл” эхний 3 үед нийлээд 54 оноо авсан ч 4-р үед 30 оноо авч сэргэхэд А.Батхуягийн тоглолт нэн чухал үүрэг гүйцэтгэлээ. Тэрээр энэ тоглолтод 17 оноо авсныхаа 13-ыг нь 4-р үед авсан юм. Скотт эрт алдааны асуудалд орсон ч 18 оноо, Уэсли 17 оноо авчээ. 

УРД ШУГАМ… 

Тус цуврал эхэлснээс хойш урд шугамны тоглогчид нь илүү тогловол хождог байдал давтагдсаар л байна. Учир нь багуудын самбарын болон будагтай талбайн тоглолт, легионер төвийн тоглогчдын өрсөлдөөн маш тэнцүүхэн байгаа юм. Иймээс 1 болон 2 номерын байрлалын тоглогчдоос их зүйл шалтгаална.  М.Өлзий-Орших энэ удаад 34 минут талбайд тоглохдоо 3 удаа бөмбөг алдсан юм. Энэ нь өмнөх тоглолтод 9 удаа бөмбөг алдсантай харьцуулахад маш сайн үзүүлэлт боллоо. 

“Эйпс”-ийн хувьд хамгаалалтаас довтолгоонд хурдан шилжих нь чухал байгаа учраас дагаад бөмбөг алдах эрсдэл ихтэй. Ялангуяа эсрэг баг урагшаа шахаж хамгаалж байгаа үед. Иймээс урд шугамны тоглогчдын бөмбөг эзэмшилт нягт байх нь тун чухал байгаа юм. Тухайлбал эхний тоглолтын төгсгөлд оноо тэнцүү үед Клайбөрн багтаа хожил авчирсан бол 2 дахь тоглолтод М.Өлзий-Орших 26 оноо (5 холын шидэлт) авч гангарсан юм. М.Өлзий-Орших, Клайбөрн нар 2 дахь тоглолтод нийт 44 оноо, 3 дахь тоглолтод 41 оноо авсан нь багийн нийт онооны тал нь гэсэн үг.

Гэвч нөгөө талд гарааны холбогч Т.Ууганбаяр 17 минут талбайд тоглохдоо ердөө 2 оноо авсан нь хангалтгүй. Нэмээд 2 удаа бөмбөг алджээ. 

Сагсан бөмбөгийн спортод 3:0 гэсэн тэргүүлэл авсан баг цувралд ялах магадлал 90 орчим хувьтай. Өнгөрсөн жил 7 тоглолтын өрсөлдөөнд “Бишрэлт Металл” ялсан бол энэ удаад “Эс Жи Эйпс” 4 дараалан хожиж, “шүүрдэх” ч боломжтой боллоо. Тэнцүүхэн багуудын өрсөлдөөнийг дуусах хүртэл дууслаа гэж хэлж болохгүй. Гэхдээ 3 дараалсан хожил гэдэг “Эйпс” энэ өрсөлдөөнд илүү байгаа гэдгийг хангалттай илэрхийлж байна. Юутай ч “Металл” одоо дахиж хожигдох эрхгүй болсон бөгөөд 4 дараалж хожих хүнд даалгавартай туллаа.