Сагсан бөмбөгийн “Дээд лиг”-ийн тэмцээний хагас шигшээ шатанд учраа таарсан “Хасын Хүлэгүүд”, “Сэлэнгэ Бодонгууд” багуудын цувралын 3 дахь тоглолт боллоо. Хэн хожсон нь цувралыг тэргүүлж эхлэх байсан тус чухал тоглолтод өнгөрсөн улирлын аварга “Хүлэгүүд” үндсэн цагт 97:87 харьцаатай хожлоо. Ингээд тоглолтын турш нийт 14 удаа онооны тэргүүлэл солигдсон энэхүү чухал тоглолтын онцлох зүйлс юу байсныг хүргэе. 

Тоглолтын өмнө нэгэн чухал мэдээлэл цацагдсан нь “Хүлэгүүд” багийн ахлах дасгалжуулагч Зелько Васильевичтэй байгуулсан гэрээгээ дуусгавар болгосон байлаа. Серби мэргэжилтний хувьд “Хүлэгүүд”-ийн хамтаар энэ жил улирлын тоглолтуудад лигийн хүснэгтийг тэргүүлж, улирлын шилдэг дасгалжуулагчаар тодроод байсан. Мөн өнгөрсөн улирал багийг удирдсан эхний жилээ лигийн аваргын цомыг хүртэж чадсан билээ. 

Ингээд тус тоглолтод “Хүлэгүүд” багийн туслах дасгалжуулагч Э.Ариунболд багийг удирдан оролцлоо. Эхний хагаст тоглолт тун тэнцүүхэн үргэлжилж 50:49 харьцаатай өндөрлөсөн. Тоглолтын 3-р үед “Бодонгууд”-ын гурван онооны шидэлтүүд дараалан оновчтой болж, улмаар онооны илүүг аван 66-72 харьцаатай дууслаа. Харин шийдвэрлэх 4-р үед “аваргууд” 31 оноо авч, өрсөлдөгч багтаа 15 оноо алдсан юм. Ингэснээр 10 онооны зөрүүтэй өрсөлдөгчөө хожиж, цувралд тэргүүлж эхэллээ. 

“Хүлэгүүд”-ээс легионер тоглогчид нь багаа тэргүүлж Иан Миллер 27 оноо, Жордан Толберт 16 оноо авлаа. Миллерийн хувьд 3 онооны шугамны араас 10 удаа шидсэний 6 нь оновчтой болсны хоёрыг нь тоглолтын 4-р үеийн төгсгөлд оруулж, багийнхаа хожлыг бататгасан юм. Тэрээр шийдвэрлэх 4-р үед нийт 11 оноо авч тоглолтын гол баатар болохын зэрэгцээ 8 удаа ашигтай дамжуулалт өгсөн нь багаа тэргүүлэх үзүүлэлт болов. 

Минутын хуваарилалт 

Жордан Толберт тоглолтын 2-р хагаст маш сайн тоглож байсан ч дасгалжуулагч 4-р үед түүнийг Миллерээр сольсон нь тун оновчтой шийдвэр байлаа. Хэзээ хэн тоглох нь ашигтайг тун сайн тооцоолж чадахын зэрэгцээ, тамирчдынхаа амралт ачааллыг зохицуулах минутын хуваарилалт их сайн болсныг онцлох хэрэгтэй. Тодруулбал “Бодонгууд”-аас 3 тоглогч 30-с дээш минут, 3 тоглогч 20-с дээш минут тоглосон бол талбайд гарсан бусад 5 тоглогч нь нийт 18 минут тогложээ. Харин нөгөө талд “Хүлэгүүд” багаас 30 минут хүртэл удаан тоглосон тамирчин байсангүй. Тодруулбал 6 тоглогч 20-с дээш минут, 2 тоглогч 10-с дээш минут, үдсэн 3 тоглогч нь нийт 22 минутыг талбайд өнгөрүүлжээ. 

Өөрөөр хэлбэл “Хүлэгүүд” тоглогчдоо илүү тэнцүүхэн хугацаанд, жигд ашигласан нь үр дүнгээ өглөө. Энэ нь зөвхөн энэ тоглолтоор тогтохгүй. Урт үргэлжлэх плэйоффын шатанд цааш явах тусам баг тамирчдад нь эерэг нөлөө үзүүлэх нь дамжиггүй. Өрсөлдөгч багаас олон минут тоглож буй гол тоглогчдын ачаалал тоглолт ирэх тусам нэмэгдэж байгаа бол “Хүлэгүүд” эсрэгээрээ байна. Жишээ нь энэ тоглолтод оноогоор тэргүүлсэн эхний 4 тоглогчийн 3 нь “Бодон” байсан ч баг нь хожиж чадсангүй. Тоглогч биш бүтэн багаа тоглуулж чадсан баг нь ялах цуврал гэдгийг багууд маш сайн мэдэж буй. 

1. Иан Миллер – 27 оноо
2. Демаркус Казинс – 26 оноо 
3. Ахмад Гилберт – 19 оноо 
4. Ц.Сэргэлэнбаатар – 19 оноо 

Гэхдээ “Хүлэгүүд”-ийн хувьд энэ нь гэнэт гарч ирсэн зүйл биш бөгөөд улиралд амжилтаараа тэргүүлсэн шалтгаануудынх нэг билээ. Мөн сүүлийн жилүүдэд тус багийн тоглолтын онцлог, хэв маяг, системд тохирох олон залуу тоглогчдыг багтаа нэгтгэж, “цус сэлбэж” чадсан. Тэдгээр тоглогчид нь ч улам чадамжиж багтаа үзүүлэх нэмэр, нөлөө нь нэмэгдсээр байгаа билээ. Дээрх бүгдийг сэлгээний тоглогчдын авсан оноогоор “Хүлэгүүд” 60:19 харьцаатай илүүрхсэн үзүүлэлт батална. Энэ нь тус цуврал эхэлснээс хойш сэлгээний тоглогчид хамгийн олон оноо авсан тохиолдол боллоо. 

Б.Билгүүний тоглох минут нэмэгдэв

Багийн ахлагч Б.Билгүүн цувралын өмнөх 2 тоглолтод нийт 29 минут орчим хугацааг талбайд өнгөрүүлсэн бол 3 дахь тоглолтод 27 минут 22 секунд талбайд тоглосон нь мэдэгдэхүйц том өөрчлөлт байлаа. Талбайд байх хугацаандаа бүх талаар ашигтай тоглож, 15 оноо, 7 самбар авч, 3 удаа ашигтай дамжуулалт өгч, 3 удаа бөмбөг таслан, 2 удаа эсрэг багийн тоглогчдын довтолгоог хаажээ. Довтолгоог 75%, торгуулийн шидэлтийг 100% оновчтой гүйцэтгэж, өөрийн туршлага ур чадвараа дахин харуулсан юм. Эхний 2 тоглолтод нийт 14 оноо аваад байсан тэрээр энэ удаад цувралын өмнөх тоглолтуудын бүх үзүүлэлтүүдээ хоёр нугаллаа. Б.Билгүүн, О.Сэргэлэн нар энэ багийн түшиг тулгуур байсан хэвээр…    

Будагтай талбайн тоглолт

“Хүлэгүүд” мөн аль болох өндөр бүрэлдэхүүнээр тоглохыг хичээсэн нь давуу байдал үүсгэлээ. Тухайлбал довтолгоонд будагтай талбайд авсан оноогоор 42 (77.8%) – 16 (50%) харьцаатай өрсөлдөгч багаа илүүрхэв. Ингэж самбартай илүү ойр тоглосон нь Казинс, Ц.Сэргэлэнбаатар, Н.Батбаяр гээд эсрэг багийн гол тоглогчдыг эрт алдааны асуудалд оруулсан гол нөлөө байв. Энэ нь онооноос ч дутуугүй ашигтай тусаж, тоглолтын төгсгөлд тактикын болоод сэтгэл зүйн том давуу тал болсон юм. Мөн дундын зайн довтолгоогоор 25/35 – 11/26 харьцаатай мөн “Хүлэгүүд” илүүрхлээ. 

Тэд цувралын өмнөх 2 тоглолтод будагтай талбай дахь тоглолт, авсан оноогоор илүү гарч чадахгүй байсан. Тэгвэл цувралын 3 дахь тоглолтод хамгийн ахиулж чадсан чухал зүйл нь боллоо. Эсрэг багийн гол тоглогч Казинсын нөлөөг хамгаалалт, довтолгооны аль аль талд бууруулж чадсаны гол илрэл энэ юм. Мөн эхний 3 тоглолтод 3 онооны шугамны араас хэн олон шидсэн баг нь хожигдсон байна. Нэмээд 3 онооны шидэлтээ олон оруулсан баг нь хожсон тохиолдол алга. Тиймээс будагтай талбайн тоглолт энэ цувралд маш чухал байх юм. Будагтай талбайд болоод дундаас авах оноо, эсрэг багийн гол тоглогчдын алдааг нэмэх, торгуулийн шидэлт энэ цувралд шийдвэрлэх үзүүлэлт болж байна. Тодруулбал: 

Толголт 1. KUL 80:75 SEL

Гол зөрүү торгуулийн шидэлт: 23/33 – 17/22

Толголт 2. SEL 97:83 KUL

Гол зөрүү будагтай талбайд авсан оноо: 36:24, Дундын зайн довтолгоо: 22/36 – 13/23

Цувралын 3 дахь тоглолтод “Хүлэгүүд”-ийн өөрчлөлт, бэлдэж орж ирсэн зүйлсээс онцолбол ийм байлаа. Тэгвэл 4 дэх тоглолтод “Бодонгууд” юу бэлдэн орж ирж, ямар хариу барих бол. Багуудын цувралын 4 дэх тоглолт гуравдугаар сарын 29-ний бямба гарагт болох хуваарьтай. Тоглолт ирэх тутам багуудын авсан нийт оноо 155, 180, 184 гээд нэмэгдэж байна. Энэ цуврал цаашид хэдэн тоглолт үргэлжилж, аль баг нь цааш шалгарахыг таах аргагүй сонирхолтой өрсөлдөөн үргэлжилсээр…